Саудиска Арабија преговара за трајна испорака на нафта надвор од Ормускиот Теснец

Саудиска Арабија преговара со купувачите од следната година, преку долгорочни договори, да испорачува дел од нафтата надвор од Ормускиот Теснец. Со тоа, моделот што се користи во услови на војната би можел да стане траен, со цел Ријад да го зголеми уделот на светскиот пазар.

Според извори запознаени со преговорите, разговорите би требало да завршат до крајот на годината. Доколку биде постигнат договор, тоа би претставувало значајна промена во начинот на кој Саудиска Арабија ја испорачува суровата нафта, имајќи предвид дека најголем дел од извозот се реализира преку долгорочни договори.

— реклама —

Војната, која влезе во осмиот месец, ги наруши традиционалните рути за транспорт на нафта, додека сообраќајот низ Ормускиот Теснец е сериозно отежнат. Големите извозници од Персискиот Залив затоа мораа да ги приспособат испораките за да обезбедат снабдување на купувачите.

— реклама —

Еден од моделите што се користи предвидува нафтата да се транспортира низ теснецот, а потоа товарот да се префрла на други танкери надвор од тој пловен пат.

Државната компанија „Сауди Арамко“ разгледува и други промени, меѓу кои избор на референтни цени за нафтата и можност за директна испорака на поголеми количества до купувачите во Азија.

— реклама —

Конечните одлуки сè уште не се донесени, а преговорите продолжуваат околу цените, трошоците за транспорт и количествата што би биле опфатени со новите договори.

Од почетокот на војната, бродските компании не сакаат да минуваат низ Ормускиот Теснец, поради што купувачите потешко обезбедуваат танкери по прифатливи цени, дури и кога нафтата е достапна.

Поради тоа, системот на префрлање на товарот кај Ормускиот Теснец веќе го користат Обединетите Арапски Емирати, Саудиска Арабија, Кувајт и Ирак за испорака на нафта надвор од овој пловен пат.