Јавното обвинителство ќе одлучи дали ќе поднесе жалба на ослободителната пресуда во предметот „Талир 2“ откако ќе ја добие и детално ќе ја анализира писмената верзија на судската одлука, изјави државниот јавен обвинител Ненад Савески.
Одговарајќи на новинарско прашање зошто Обвинителството веднаш не најавило жалба, како што вообичаено се случува по ослободителни пресуди, Савески рече дека не присуствувал на усното образложение во судницата.
„Не можам да ви одговорам сега бидејќи ќе се чека писмената верзија на пресудата. Целото образложение ќе се анализира и тогаш ќе се донесе одлука дали судот го убедил Обвинителството со својата одлука и образложение или не“, изјави Савески.
Тој ги отфрли обвинувањата дека повлекувањето на овластувањата на обвинителката Ленче Ристоска влијаело врз исходот на предметот „Талир 2“, оценувајќи дека повлечените овластувања се однесувале само на предмети за кои обвинителите немале редовна надлежност.
Според Савески, Ристоска како обвинител во Основното јавно обвинителство Скопје имала право да продолжи да постапува по предметот.
„Токму овој предмет, доколку таа не поднесеше оставка, ќе беше во нејзино надлежно постапување. Моето повлекување на овластувањата никако не можеше да се смета дека имало последица да ѝ биде одземен предметот. Доколку останеше, таа ќе работеше на него“, рече Савески, додавајќи дека нејзината оставка била лична одлука.
На овие тврдења реагираше поранешната обвинителка Ленче Ристоска, која на социјалните мрежи наведе дека изјавите на Савески се неточни.
Ристоска го демантира Савески: Лично му кажав дека ако ми ги одземе предметите, ќе поднесам оставка
Поранешната јавна обвинителка Ленче Ристоска ги отфрли тврдењата на државниот јавен обвинител Ненад Савески дека предметот „Талир 2“ ќе останел во нејзина надлежност доколку не поднела оставка.Во објава на Фејсбук, Ристоска наведува дека тоа не е точно и објаснува дека како обвинител за врски можела да постапува по предмети што се во надлежност на Канцеларијата за врски, а по исклучок и по предмети на кои претходно работела, но само врз основа на посебно овластување од државниот јавен обвинител.
Македонија | пред 4 часа
