Државниот јавен обвинител Ненад Савески изјави дека истрагата во која е опфатен поранешниот вицепремиер Артан Груби сè уште е во тек и дека обвинителството продолжува со прибирање докази и спроведување истражни дејствија.
Говорејќи за постапката, Савески посочи дека секој јавен обвинител изготвува сопствен истражен план во кој ги утврдува доказите што треба да бидат обезбедени за конкретниот предмет.
„Во овој момент не би навлегувал во конкретни предмети, бидејќи не е соодветно тие да се коментираат јавно додека се во тек“, изјави Савески.
Тој потсети дека законскиот рок за спроведување истрага изнесува шест месеци, но може да биде продолжен доколку за тоа постои потреба.
„Не постои прецизно мерило кога доказите се доволни, тоа е проценка на јавниот обвинител“, рече Савески.
Во однос на мерките за обезбедување присуство на осомничените лица, државниот обвинител нагласи дека јавниот обвинител може да предложи мерки, но конечната одлука ја носи судот.
„Сакам да нагласам дека јавните обвинители мора да постапуваат самостојно и без притисоци. Моја обврска е да обезбедам услови за нивна независност и професионално работење“, додаде Савески.
Тој не откри дополнителни детали за предметот поврзан со Артан Груби, повикувајќи се на интересите на истражната постапка.
