„СДС е во целосна конфузија, сто теми во едно соопштение, а ниту еден аргумент“, велат од ВМРО-ДПМНЕ

ВМРО-ДПМНЕ преку соопштение реагира на денешното соопштение на СДС оцени дека опозициската партија се наоѓа во „целосна конфузија“ и дека во едно соопштение изнесува повеќе теми без, како што велат, ниту еден аргумент.

Од владејачката партија тврдат дека соопштението на СДС е доказ за политичка паника и внатрепартиски хаос, обвинувајќи го раководството на партијата дека ја довело СДС на маргините на политичката сцена.

— реклама —

„Сто теми, сто лаги и целосен хаос во СДС. Дното во СДС нема крај. СДС е партија без визија, без план и без стратегија за државата“, се наведува во реакцијата.

— реклама —

Во соопштението, ВМРО-ДПМНЕ ја повикува СДС да престане со, како што наведува, лагите и конструкциите, оценувајќи дека тие се резултат на страв и внатрешни проблеми во партијата.

Партијата воедно обвинува дека СДС во минатото ја задолжувала државата, спроведувала коруптивни политики и носела одлуки на штета на Македонија, поради што, според ВМРО-ДПМНЕ, ја изгубила довербата кај граѓаните.

— реклама —

Осврнувајќи се на обвинувањата на СДС поврзани со наводните напади врз млади активисти во Ново Село, од ВМРО-ДПМНЕ велат дека доколку опозициската партија располага со докази, треба да ги достави до надлежните институции.

— реклама —

„Во спротивно, станува збор за груба манипулација и политичка злоупотреба на јавноста“, се наведува во реакцијата.

На крајот, ВМРО-ДПМНЕ оценува дека СДС и нејзиното раководство немаат идеи, стратегија и кредибилитет.