ВМРО-ДПМНЕ преку соопштение ги отфрли обвинувањата на СДСМ во врска со изградбата на нов Клинички центар, обвинувајќи го поранешниот министер за здравство Венко Филипче дека со години давал ветувања без реализација, додека здравствениот систем се соочувал со сериозни проблеми.
Од владејачката партија велат дека во периодот кога СДС беше на власт, граѓаните се соочувале со недостиг од лекови, лоши услови за лекување и сомнежи за корупција и спорни тендерски постапки.
„Филипче ветуваше нов Клинички центар, а остави руинирано здравство и сомнежи за корупција. Наместо инвестиции во здравството, граѓаните добија хаос и нереализирани ветувања“, се наведува во реакцијата.
Од ВМРО-ДПМНЕ тврдат дека оставиле готов проект за нов Клинички центар со обезбедени 128 милиони евра и дека, доколку бил реализиран, државата ќе добиела современ здравствен комплекс уште во 2021 година.
Според партијата, Владата сега е насочена кон реализација на капитални проекти во здравството, меѓу кои завршување на Клиничката болница во Штип, студентскиот дом и Факултетот за медицински науки, Здравствениот дом во Кичево со проширена дејност, како и Клиничката болница во Тетово.
Во однос на новиот Клинички центар, од ВМРО-ДПМНЕ посочуваат дека се разгледува локацијата кај базенот „Борис Трајковски“, која заедно со болницата „8 Септември“ и поликлиниката „Букурешт“ би формирала современ здравствен комплекс со добра сообраќајна поврзаност и можност за привлекување пациенти и од соседните земји.
„Владата предводена од ВМРО-ДПМНЕ вложува во здравството, здравствените работници и се грижи за граѓаните. Времето на измами и лажни ветувања заврши“, се наведува во партиското соопштение.
