„СДС и Левица со координирана блокада со десетици илјади амандмани го блокираат Изборниот законик и реформите“, велат од ВМРО-ДПМНЕ

ВМРО-ДПМНЕ преку соопштение обвини дека СДСМ и Левица со поднесување десетици илјади амандмани го блокираат донесувањето на Изборниот законик и, како што наведуваат, го попречуваат спроведувањето на реформските процеси во државата.

— реклама —

Од партијата соопштија дека двете опозициски партии учествувале во разговорите и усогласувањето на законскиот текст, но сега, според нив, со големиот број амандмани се обидуваат да го спречат неговото усвојување.

— реклама —

Во соопштението се наведува дека предложениот Изборен законик е усогласен со препораките на ОБСЕ и ОДИХР и претставува дел од реформските обврски на земјата.

ВМРО-ДПМНЕ оценува дека, наместо да понудат суштински предлози, СДСМ и Левица прибегнале кон парламентарна опструкција. Од партијата порачуваат дека се подготвени да разговараат за сите конструктивни забелешки што би придонеле за подобрување на изборниот процес, но сметаат дека поднесувањето десетици илјади амандмани не е обид за подобрување на законското решение.

— реклама —

Воедно, ВМРО-ДПМНЕ повторува дека останува на ставот македонската дијаспора да добие можност да гласа по електронски пат на претседателските избори, оценувајќи дека секој македонски граѓанин, без разлика каде живее, треба полесно да го оствари своето избирачко право.

— реклама —

Од партијата во соопштението тврдат дека зад постапките на СДСМ и Левица стои страв од изборен пораз и додаваат дека Владата ќе продолжи со реформите и покрај, како што велат, обидите за нивно блокирање.