ВМРО-ДПМНЕ преку соопштение обвини дека СДС манипулира со економските податоци и преку, како што велат, селективно толкување на информациите се обидува да создаде песимизам кај граѓаните.
Од владејачката партија посочуваат дека проекциите на Меѓународниот монетарен фонд се прогнози, а не конечни резултати, додавајќи дека истата институција очекува Македонија да продолжи со стабилен економски раст и да остане меѓу земјите со позитивни економски перспективи и макроекономска стабилност.
Во соопштението се наведува дека во периодот на владеење на СДС и ДУИ државата се соочила со рекордна инфлација, високи цени на храната и енергенсите, намалена доверба кај инвеститорите и нарушени јавни финансии.
Од ВМРО-ДПМНЕ велат дека актуелната Влада е фокусирана на капитални инвестиции, инфраструктурни проекти, подобрување на деловната клима и привлекување домашни и странски инвестиции, при што, според нив, резултатите од овие политики се веќе видливи.
Според партијата, Буџетот останува стабилен, а со ребалансот се обезбедуваат дополнителни средства за општините, земјоделството, раст на платите, студентскиот и ученичкиот стандард, социјалната заштита, капиталните инвестиции и забрзување на инвестицискиот циклус.
Во соопштението се наведува и дека инфлацијата е намалена на 3,4 проценти, а владините мерки преземени за време на енергетската криза дале резултати.
Од ВМРО-ДПМНЕ истакнуваат дека започнува изградбата на автопатот Скопје–Блаце, додека низ државата се реализираат шест автопатски делници.
Воедно, партијата ги отфрла, како што наведува, тврдењата на СДС за пензискиот систем, посочувајќи дека исплатата на пензиите е редовна и сигурна, а Владата останува посветена на негово зајакнување и на подобрување на животниот стандард на пензионерите.
Од ВМРО-ДПМНЕ оценуваат дека наместо, како што велат, да шири дезинформации, СДС треба да понуди аргументи и да преземе одговорност за сопствените политики, додавајќи дека Владата останува фокусирана на економски раст, нови инвестиции, отворање работни места и подобрување на животниот стандард на граѓаните.
