ВМРО-ДПМНЕ преку соопштение обвини дека СДСМ со критиките за можната изградба на центри за податоци во Македонија зазема став кој, според владејачката партија, се совпаѓа со наративите што се користат во Кина и САД против ваквите инвестиции.
„Опозициската СДС е на иста линија како и Кина, против Соединетите Американски Држави“, велат од ВМРО-ДПМНЕ, оценувајќи дека критиките на СДСМ за изградбата на центри за податоци се дел од поширока кампања против развојот на оваа технологија.
Од партијата посочуваат дека во изминатиот период и во САД, главно преку социјалните мрежи, се креира јавно мислење против изградбата на центри за податоци. Според нив, американски медиуми известувале за наводни активности поврзани со кинески профили и бот-мрежи преку кои се обидувало да се влијае врз американската јавност.
ВМРО-ДПМНЕ тврди дека дел од пораките што се шират преку тие профили се слични со ставовите што ги застапува СДСМ – дека центрите за податоци и развојот на вештачката интелигенција го оптоваруваат електроенергетскиот систем, ги зголемуваат сметките за електрична енергија и дека од нив корист би имале поединци, а не јавноста.
Од партијата додаваат дека ваквите активности, според пишувањата во американските медиуми на кои се повикуваат, се поврзуваат со настојувањата на Кина да ја зајакне својата позиција во технолошката трка со САД, особено во развојот на современи центри за податоци и напредни системи за вештачка интелигенција.
„Но, прашањето е што ги тера СДСМ и кој е нивниот интерес да бидат на иста линија со Кина и да се стават во функција против Америка, да шират хистерија, страв и паника во јавноста со единствена цел, граѓаните да ги свртат против можноста во државата да се градат центри за податоци кои кај нас би дошле како странска директна инвестиција“, наведуваат од ВМРО-ДПМНЕ.
Од владејачката партија порачуваат дека, како што велат, обидите за спречување на вакви инвестиции нема да го запре технолошкиот развој на државата.
„Иднината на светот е развојот на високата информатичка технологија и Македонија мора да го фати чекорот, за и во оваа индустрија да не биде во последните редови“, се наведува во реакцијата.
Од ВМРО-ДПМНЕ додаваат дека развојот на оваа индустрија треба да се одвива со почитување на законските прописи, особено оние што се однесуваат на заштитата на животната средина, домашните ресурси и државните интереси.
