ВМРО-ДПМНЕ преку соопштение реагира на денешните критики од СДС за цените на горивата, оценувајќи дека опозициската партија не може да се помири со, како што наведуваат, економските резултати на актуелната Влада.
Од партијата посочуваат дека Македонија во услови на глобална криза предизвикана од случувањата и немирите на Блискиот Исток успева да ги задржи цените на нафтените деривати на ниско ниво во споредба со земјите од регионот.
„Тоа не дојде само по себе, туку тоа е директен резултат на мерките преземени од Владата предводена од ВМРО-ДПМНЕ“, наведуваат од партијата.
Во реакцијата се посочува и на движењето на инфлацијата. Според ВМРО-ДПМНЕ, цените на производите континуирано се следат, а последните податоци на Државниот завод за статистика покажуваат инфлација од 2,3 проценти.
Од партијата прават споредба со периодот кога СДС беше на власт, посочувајќи дека тогаш инфлацијата достигнувала и 16 проценти.
„СДС да имаа идеи за добри мерки, немаше во нивно време на власт инфлацијата да руши двоцифрени рекорди со 16 проценти“, се наведува во реакцијата.
Од ВМРО-ДПМНЕ му порачаа на СДС наместо да критикува, да ги следи мерките и политиките што ги спроведува актуелната Влада.
„Ако сака СДС нешто корисно да направи, нека седи, гледа и учи како се следат состојбите, како се води држава, како се развива економијата, и како се работи во интерес на граѓаните и државата“, стои во партиското соопштение.
