Општина Гази Баба преку соопштение реагира на денешната изјава на координаторот на советничката група на СДСМ во општината, Александар Велјановски, оценувајќи ја како невистинита и насочена кон создавање немир меѓу граѓаните.
Од Општината велат дека за разлика од периодот кога со неа управувал СДСМ, денес се работи согласно Законот за урбанистичко планирање и Генералниот урбанистички план на Град Скопје.
„Денешната изјава на координаторот на советничката група на СДС во Општина Гази Баба Александар Велјановски е целосно невистинита, полна со непознавање на материјата и со единствена цел внесување немир помеѓу граѓаните“, се наведува во реакцијата.
Од Општина Гази Баба посочуваат дека предвидените површини за комерцијална изградба, деловни простории и хотелски комплекси се користат исклучиво согласно нивната намена.
Во реакцијата се обвинува и претходното раководство на општината дека во периодот на управување на СДСМ биле констатирани бројни прекршувања на законските процедури, за чии последици, како што наведуваат, денес плаќаат граѓаните.
Од Општината нагласуваат дека во моментов Гази Баба е големо градилиште и дека се реализираат проекти во повеќе области, меѓу кои изградба на градинки, училишта, спортски сали, улици и канализациски системи.
„Ние сме посветени на работа и создавање дела, а теориите за изигрување на Законот ги оставаме на СДС кои впрочем се мајстори за тоа“, стои во реакцијата на Општина Гази Баба.
