ВМРО-ДПМНЕ преку соопштение ги отфрли обвинувањата на СДСМ дека пациентите се излажани во врска со лекот „Фостер“, оценувајќи дека станува збор за дезинформации и политички манипулации.
Од партијата велат дека намалувањето на референтната цена на лекот следувало по вклучувањето на генерички лек на позитивната листа, со цел да се создаде конкуренција, да се обезбеди поголем избор за пациентите и да се намалат трошоците.
„Алтернативата е достапна во земјата. Ова е стандардна практика и препорака на Светската здравствена организација, со која се овозможуваат заштеди што остануваат во здравствениот систем, наместо кај странските фармацевтски компании“, наведуваат од ВМРО-ДПМНЕ.
Во реакцијата се посочува дека Владата ја проширила позитивната листа со три нови антикоагулантни лекови – еноксапарин, надропарин и ривароксабан, кои од 1 јули се достапни во аптеките низ државата.
Од ВМРО-ДПМНЕ ја обвинуваат СДС дека молчела кога, како што наведуваат, за време на нивното владеење онколошките пациенти останувале без биолошка терапија, а пациентите со цистична фиброза без неопходните лекови.
Партијата додава дека Владата продолжува да инвестира во здравството преку проширување на позитивната листа, зголемување на платите, реновирање на здравствените установи и набавка на нова медицинска опрема, оценувајќи дека здравството останува еден од нејзините приоритети.
