СДСМ остро ја критикуваше најавата на Владата за инвестиции од 10 милијарди евра во инфраструктурни проекти во наредната деценија, оценувајќи дека станува збор за ново задолжување без јасна развојна стратегија.
Од партијата тврдат дека Владата предводена од премиерот Христијан Мицкоски веќе го зголемила јавниот долг за повеќе од 2,3 милијарди евра во изминатите две години и предупредуваат дека реализацијата на најавените проекти би можела дополнително да го зголеми задолжувањето на државата.
Според СДСМ, тоа би значело повисоки каматни трошоци, поскапо финансирање и помалку средства за плати, пензии и јавни услуги.
Партијата посочува и дека со најавениот план се предвидува изградба на 57 километри автопат во период од десет години, што, според нив, е недоволно за посериозен економски развој и подобрување на инфраструктурната поврзаност.
Во реакцијата се наведува дека не се познати конкретните извори на финансирање на проектите и дека во услови на, како што тврдат од СДСМ, намалени странски инвестиции и ограничени можности за користење европски фондови, најверојатното решение е ново задолжување.
„Наместо да се фокусира на вистински развој преку продолжување на европскиот пат и подобрување на деловната клима, Владата нуди пропагандни најави без финансиска и институционална основа“, велат од СДСМ.
Од опозициската партија оценуваат дека ваквиот пристап може да резултира со повисок јавен долг, послаб економски раст и дополнителен притисок врз животниот стандард на граѓаните.
