СДСМ Аеродром преку соопштение најостро го осуди случајот со врсничкото насилство врз малолетно девојче во скопската населба Аеродром, оценувајќи дека станува збор за сериозен пропуст на институциите во заштитата на децата.
Од партијата бараат Министерството за внатрешни работи итно да го расчисти случајот и да ја утврди одговорноста на сите учесници, но и да провери дали се точни информациите дека полициски службеници во Полициската станица Лисиче не постапиле по пријавата.
„Дали е точно дека пријавувачите биле вратени со образложение дека жртвата треба сама да го пријави насилството?“, прашуваат од СДСМ Аеродром.
Воедно, тие бараат одговори и од Општина Аеродром и од градоначалникот Дејан Митески за тоа какви мерки се преземени за спречување на врсничкото насилство.
„Каде се превентивните програми? Каде е соработката со училиштата, стручните служби и родителите? Што презела Општина Аеродром за спречување на врсничкото насилство, кое очигледно станува сè почеста појава?“, наведуваат од партијата.
СДСМ Аеродром повикува на координирана акција на сите надлежни институции, обезбедување психолошка поддршка за жртвата и изработка на конкретен план за превенција на врсничкото насилство во сите училишта на територијата на општината.
„Безбедноста на нашите деца мора да биде највисок приоритет на сите институции кои имаат надлежност во нивната заштита“, порачуваат од СДСМ Аеродром.
