СДСМ преку соопштение го обвини премиерот Христијан Мицкоски и ВМРО-ДПМНЕ за, како што наведуваат, неодговорен однос кон прашањето за безбедноста на водата за пиење и здравјето на граѓаните.
Од партијата велат дека во последните денови предупредуваат на случаи со неисправна или загадена вода низ државата, а особено го посочуваат случајот со Гостивар, каде што, според нив, повеќе од 5.000 лица побарале медицинска помош поради труење.
СДСМ тврди дека и понатаму нема објавен документ со целосни анализи со кој би се потврдила исправноста на водата во Гостивар. Од партијата прашуваат и зошто надлежните институции не ги објавуваат резултатите од испитувањата и кој презема одговорност за одлуките поврзани со водоснабдувањето.
„Од почетокот на кризата нема ниту едно стручно лице, ниту еден документ со анализи, ниту една институција и одговорно лице што стои зад исправноста“, наведуваат од СДСМ.
Опозициската партија посочува и на други случаи во земјата, тврдејќи дека во повеќе од 50 места нема јавно објавени анализи на водата. Според нив, во последните денови биле регистрирани дополнителни проблеми во Демир Капија и Кривогаштани, додека четири реки биле загадени.
СДСМ го обвинува Мицкоски дека наместо со решавање на проблемите, се занимава со политички пресметки и дека власта, како што велат, се обидува да ја исмее загриженоста на опозицијата за здравјето на граѓаните.
Од партијата бараат институциите да ги објават резултатите од анализите, да се утврди кој донел одлуки во текот на кризата во Гостивар и да се понесе одговорност доколку се утврдат пропусти.
„Ароганцијата нема крај, а одговорност сè уште нема“, порачаа од СДСМ.
