СДСМ бара ДДВ од пет отсто за горивата: Предлогот на Владата е задоцнета и половична мерка

Најавеното намалување на данокот на додадена вредност за горивата од 18 на 10 отсто е задоцнета и половична мерка, оцени СДСМ, од каде што тврдат дека Владата реагира дури откако високите цени веќе го погодија животниот стандард на граѓаните.

Од партијата велат дека уште на почетокот на кризата побарале ДДВ за горивата да се намали на пет отсто, веднаш да се укине акцизата, а данокот за основните прехранбени производи да се сведе на нула.

— реклама —

„Владата не презеде ништо. Ги остави цените да растат, а граѓаните да полнат гориво на рати и да купуваат сè помалку. Сега, кога штетата е направена, излегува со половична мерка и бара аплауз“, соопшти СДСМ.

Според партијата, намалувањето на ДДВ од 18 на 10 отсто не претставува навремена заштита на животниот стандард, туку потврда дека Владата доцни со мерките.

— реклама —

„Ова не е грижа, туку задоцнета шминка. Прво граѓаните плаќаат високи цени, а потоа Владата им враќа мал дел и се претставува како спасител“, наведуваат од СДСМ.

— реклама —

Од опозициската партија се осврнаа и на изјавата на премиерот Христијан Мицкоски дека цената на горивата „во суштина не е ниска“, но е пониска во споредба со соседните земји.

„Не е доволно граѓаните да се убедуваат дека во друга држава се плаќа повеќе. Горивото не е луксуз. Тоа е превоз до работа, испорака на леб до продавница и стока до пазар. Кога поскапува дизелот, поскапува сè“, велат од СДСМ.

Партијата ја критикува и оцената дека намалувањето на данокот ќе има последици врз државниот буџет, обвинувајќи ја Владата дека средствата ги насочувала кон непродуктивни трошоци и спорни договори наместо кон мерки за помош на граѓаните.

„Намалувањето од 18 на 10 отсто, по месеци без реакција, не е политика. Тоа е признание дека Владата доцни. Нема поевтин живот со доцна одлука“, порачаа од СДСМ.