СДСМ остро реагира на изјавите на премиерот Христијан Мицкоски во врска со најавените центри за податоци и неговите коментари за опозицијата, барајќи од Владата целосна транспарентност за проектите.
Од опозициската партија велат дека Мицкоски, зборувајќи за „Фројд“ и однесувањето на опозицијата, се обидува да го сврти вниманието од прашањата што, според нив, остануваат без одговор во врска со инвестициите во центри за податоци.
СДСМ прашува која е мултинационалната компанија со која, како што изјавил Мицкоски, се водат преговори, какви се условите за инвестицијата, колкави количества електрична енергија и вода би се користеле, каде би се граделе центрите за податоци и под кои еколошки стандарди.
Од партијата оценуваат дека најавите за центри за податоци поврзани со вештачка интелигенција се претставуваат без доволно конкретни информации за јавноста.
„Граѓаните заслужуваат факти, а не психолошки игри на Мицкоски“, порача СДСМ, барајќи од Владата да ги објави деталите за проектите и да обезбеди, како што велат, целосна транспарентност.
Од СДСМ дополнително прашуваат кој ќе гарантира дека реализацијата на ваквите инвестиции нема да создаде дополнителен товар за граѓаните во однос на користењето на електричната енергија, водата и државното земјиште.
