СДСМ до ВМРО-ДПМНЕ: „Што направивте освен криминални тендери?“

СДСМ упати нови остри критики кон власта, обвинувајќи ја дека земјата ја води кон изолација, економски проблеми и застој на европскиот пат.

Од СДСМ прашуваат „докога Заев и Филипче“ ќе се користат како алиби за, како што велат, состојбите во земјата и потсетуваат на периодот кога нивната влада ја внела Македонија во НАТО и ги отворила преговорите со Европската Унија.

— реклама —

„Таа влада ја воведе земјата во НАТО. Вие бевте против. Сега Тимчо вели: тоа е најдобра работа за земјата и за инвестициите“, наведуваат од СДСМ.

Од партијата тврдат дека актуелната власт ги одбива инвеститорите и дека земјата се соочува со изолација.

— реклама —

СДСМ се осврнува и на економските показатели, наведувајќи дека нивната влада имала 250 милиони евра инвестиции во еден квартал, додека, според нив, актуелната власт има 18 милиони евра.

Во реакцијата се споредуваат и прославите за членството во НАТО, при што од СДСМ наведуваат дека нивната влада организирала прослави за 280.000 евра, додека актуелната власт, како што тврдат, организирала прослава со Гета за 5,53 милиони евра.

Од СДСМ потсетуваат и на кризите со кои се соочувала нивната влада, како пандемијата на ковид-19, енергетската криза и почетокот на војната во Украина, при што тврдат дека биле преземени мерки за помош на граѓаните и биле зголемени платите и пензиите.

— реклама —

Во однос на европските интеграции, СДСМ оценува дека претходната влада ги отворила преговорите со ЕУ, додека сегашната власт, според нив, го кочи процесот.

Од партијата ја споменуваат и Преспанската спогодба, повикувајќи се на неодамнешни изјави од власта во однос на нејзиното значење за македонскиот идентитет, јазик и култура.

СДСМ дополнително ја обвинува власта за задолжување од 4 милијарди евра во период од две години, како и за влошување на состојбата на земјоделците и осиромашување на граѓаните.

„Имате ли барем нешто со што да се пофалите? Немате“, велат од СДСМ, додавајќи дека власта, според нив, нема резултати со кои би можела да се пофали.