СДСМ обвини дека кризата во сточарството и откупот на млекото се продлабочува, додека Владата и министерот за земјоделство Цветан Трипуновски не преземаат соодветни мерки за поддршка на производителите.
Од опозициската партија велат дека сточарите се доведени во тешка состојба и дека сѐ повеќе размислуваат за затворање на фармите поради ниските откупни цени и неизвесноста околу пласманот на производството.
„Откупната цена на млекото е драстично намалена и понижувачка, само дваесетина денари за литар. Во исто време, цените на млекото и млечните производи во маркетите растат, што значи дека некој прави профит врз грбот на земјоделците, а власта тоа го дозволува“, соопшти СДСМ.
Партијата посочува дека две млекарници во делчевскиот регион најавиле прекин на откупот на млеко, што дополнително ја влошува состојбата за сточарите кои остануваат без сигурен пласман.
СДСМ реагира и за, како што наведуваат, доцнењето на исплатата на субвенциите за добиток и премиите за млеко, барајќи итна интервенција преку интервентната програма за поддршка на производителите на кравјо млеко.
„Мицкоски како цунами го уништи земјоделството. Ги излажа и изигра луѓето кои се заслужни што имаме храна. Субвенциите им се намалени за 40 милиони евра, а откупот е намален за 46 проценти“, тврдат од СДСМ.
Од партијата оценуваат дека проблемите не се ограничени само на сточарството, туку ги погодуваат и градинарите, оризопроизводителите, пчеларите и другите земјоделски гранки.
СДСМ бара одговорност од министерот Трипуновски и од Владата, поставувајќи прашања дали има средства во Буџетот за исплата на субвенциите и зошто не се преземаат мерки за подобрување на откупните цени на земјоделските производи.
