СДСМ преку соопштение обвини дека економските показатели во земјава бележат влошување, оценувајќи дека Владата предводена од премиерот Христијан Мицкоски не ги исполнува ветувањата за економски развој.
Од партијата тврдат дека странските директни инвестиции во 2025 година се намалиле за 61 отсто, односно од 1,2 милијарди евра во 2024 година на 468 милиони евра во 2025 година, што, според нив, претставува еден од најслабите резултати во регионот.
СДСМ посочува и дека индустриското производство во првите пет месеци од 2026 година е намалено за 0,3 отсто, додека во мај е регистриран пад од два отсто. Според партијата, негативни резултати бележат преработувачката индустрија, производството на електрична опрема, машини и моторни возила.
Во партиското соопштение се наведува дека потрошувачката кошничка во изминатите две години поскапела за околу 10.000 денари, а Владата, како што тврдат, не презела навремени мерки за ограничување на растот на цените.
СДСМ оценува дека инфлацијата и натаму останува висока, особено кај храната и енергијата, што, според нив, дополнително го намалува животниот стандард на граѓаните.
Од партијата обвинуваат дека наместо нови инвестиции и отворање работни места, државата се соочува со раст на долговите и, како што наведуваат, нетранспарентно трошење на јавните средства. Според СДСМ, економските резултати се спротивни на владините тврдења за напредок и економски раст.
