СДСМ оцени дека најавените реформи на медиумскиот сектор во Унгарија, по победата на Петер Маѓар и неговата партија Тиса, претставуваат важен сигнал за враќање на демократските стандарди и европските вредности во регионот.
Според партијата, идната унгарска влада најавува „длабока реформа на медиумите“ кои, како што тврдат, со години биле под контрола на досегашниот премиер Виктор Орбан.
Во соопштението, СДСМ тврди дека влијанието на медиумските структури поврзани со Орбан се чувствува и во Македонија, при што, според нив, значителен дел од медиумскиот простор е под такво влијание.
Партијата обвинува дека во домашниот медиумски простор доминираат, како што велат, „лажни вести, измислени афери и координирани кампањи“, насочени против СДСМ и лидерот Венко Филипче.
Воедно, наведуваат дека по нивните претходни најави за политички промени во Унгарија, следеле засилени кампањи против нив, кои, според СДСМ, биле спроведувани преку медиуми, поединци и, како што тврдат, „конструирани случаи и наративи“.
СДСМ изразува очекување дека промените во Унгарија ќе доведат до нормализација на односите со Европската Унија, зајакнување на владеењето на правото и поголема регионална соработка.
„Се надеваме дека медиумите ќе се ослободат од политичка контрола и дека ќе се обезбеди објективно и професионално информирање“, наведуваат од партијата, порачувајќи дека „време е за Европа и демократија“.
