СДСМ обвини дека премиерот Христијан Мицкоски со својата вчерашна изјава за состојбата со водата во Гостивар признал дека таа со години не била бактериолошки исправна.
Од партијата се повикуваат на изјавата на Мицкоски дека „верува дека за првпат по многу години граѓаните ќе користат вода која е целосно бактериолошки исправна“.
„Со оваа реченица премиерот јавно призна: Повеќе од две години, додека ВМРО-ОКГ има апсолутна власт, водата во Гостивар не била бактериолошки исправна. Две години знаеле. Две години молчеле. Две години граѓаните пиеле загадена вода“, велат од СДСМ.
Партијата додава дека, според нив, проблемот сè уште не е надминат.
„А водата сѐ уште не е целосно исправна. По хиперхлорирањето се појавила нова бактерија, изјави Христијан Мицкоски. Министерот Клековски ветуваше дека до крајот на неделата ќе биде безбедна. Сѐ уште чекаме официјална потврда“, наведуваат од СДСМ.
Оттаму тврдат дека сè уште не се објавени документите за тоа кој потпишал дека водата е технички исправна за капење, додека граѓаните ја користат.
Според СДСМ, проблеми со неисправна вода има и во други населени места низ државата, а од Владата бараат одговор дали знаела и за тие случаи.
Во соопштението партијата повторно упати критики кон премиерот и за неговото патување во Белгија, оценувајќи дека заминува „додека половина Македонија се соочува со проблеми со неисправна вода за пиење“, а за загадувањето на Лепенец и Вардар, како што наведуваат, сè уште нема утврдена одговорност.
„Мицкоски сакаше да се претстави како спасител. Наместо тоа – јавно призна кривично дело“, се наведува во соопштението на СДСМ.
