СДСМ на денешната пре-конференција предложи 10 итни мерки за подобрување на безбедноста во училиштата и ученичките домови, оценувајќи дека состојбата со насилството меѓу учениците станува сè поалармантна.
На прес-конференција, Јованче Манасков побара одговорност од Весна Јаневска и директорите на училиштата, како и вонреден инспекциски надзор.
„Секојдневно сме сведоци на булинг, физички пресметки, закани и инциденти со ладно оружје во училиштата и ученичките домови. Ова е јасен сигнал дека системот потфрла“, рече Манасков.
Меѓу предложените мерки се воведување унифициран безбедносен протокол во сите училишта, вработување психолози и педагози, формирање училишни тимови за превенција на насилство и национална анти-булинг програма.
СДСМ предлага и засилена соработка меѓу училиштата, МВР и центрите за социјална работа, воведување анонимна линија и дигитална платформа за пријавување насилство, како и поголем надзор во училиштата и ученичките домови.
Во пакетот мерки е предвидено и воведување обврзувачки програми за ментално здравје кај младите, построга одговорност за институциите што не реагираат навремено и формирање национален кризен штаб за безбедност во образованието.
Од партијата велат дека институциите немаат координација и стратегија за превенција, а цената за тоа, според нив, ја плаќаат учениците.
