СДСМ на денешната прес-конференција на Јованче Манасков од Комисијата за образование ја претстави својата визија за реформи во образованието преку платформата „Твоја држава, твоја шанса“, најавувајќи бесплатно високо образование, ваучери за обуки во нови технологии и повисоки плати за наставниците.
На денешната прес-конференција, Јованче Манасков оцени дека образовниот систем е „распарчен, бирократизиран и брутално партизиран“, обвинувајќи дека учениците и просветните работници се жртви на, како што рече, политички експерименти.
Според него, училиштата се претвориле во „фабрики за оценки“, а факултетите во чекални за Бирото за вработување или за иселување, при што квалитетното образование станува сè потешко достапно за младите од семејства со поскромни приходи.
Како дел од предложените мерки, СДСМ предвидува ваучер во вредност од 2.000 евра за секој матурант за обуки во областа на програмирањето, вештачката интелигенција и зелените технологии, со цел младите да стекнат вештини за подобро платени работни места.
Платформата предвидува и целосно бесплатни студии на државните универзитети, како и бесплатен персонален систем за учење базиран на вештачка интелигенција за секој ученик.
Во делот на доживотното учење, СДСМ предлага факултетите да се трансформираат во центри за преквалификација и усовршување, а секој граѓанин да добие „дигитален пасош на знаење“ со ваучери наменети за едукација во текот на целата кариера.
Манасков најави и дека наставничката професија треба да добие повисок општествен статус, при што платите на наставниците би биле најмалку 25 проценти повисоки од просечната нето-плата во државата.
„Знаењето не смее да биде привилегија, туку право. Паметна држава значи моќен народ“, порача Манасков.
