СДСМ преку соопштение бара од Владата целосно да го објави извештајот за квалитетот и безбедноста на водата за пиење во Гостивар, обвинувајќи дека досега во јавноста се презентирани само делови од документацијата.
Од партијата велат дека, и по повеќенеделните барања, граѓаните сè уште немаат пристап до еден целосен документ во кој ќе бидат објавени сите резултати од испитувањата на водата.
„Каде е целиот извештај за водата во Гостивар? Клековски објави само четвртина. Делче само. За останатото, граѓаните ги упати кај ЦУК, кај АХВ и кај „Комуналец““, наведуваат од СДСМ.
Од партијата прашуваат зошто граѓаните треба сами да ги собираат информациите од различни институции, наместо сите податоци да им бидат достапни на едно место.
Според СДСМ, по 22 дена проблеми со водата и околу 5.000 заболени, граѓаните не бараат дел од извештајот, туку целосна документација која ќе ги содржи сите земени мостри, лабораториски анализи, датуми, утврдени бактерии и измерени вредности, како и информација за сите институции што учествувале во испитувањата.
Од партијата особено го поставуваат прашањето кој, врз основа на кои резултати и со чиј потпис утврдил дека водата е безбедна за пиење.
„Не четвртина кај Министерството. Не остаток кај „Комуналец“. Не парче кај АХВ. Не алиби кај ЦУК“, се наведува во реакцијата.
СДСМ смета дека информациите за безбедноста на водата за пиење не смеат да бидат расфрлани по различни институции, туку мора да бидат јавно достапни и обединети во еден целосен извештај.
„Водата за пиење е прашање на јавно здравје. Информациите за нејзината безбедност не се сопственост на едно претпријатие или архива што граѓаните треба да ја бараат на шалтери“, велат од партијата.
СДСМ бара извештајот веднаш да биде објавен во целост, со сите резултати и со потписите на одговорните лица.
