СДСМ оцени дека посетата на претседателот на Европскиот совет, Антонио Кошта, потврдила дека уставните измени се единствениот услов за формално отворање на пристапните преговори на Македонија со Европската Унија.
Од партијата соопштија дека пораката од Кошта била јасна и директна, обвинувајќи го премиерот Христијан Мицкоски дека со месеци ја доведувал јавноста во заблуда околу евроинтегративниот процес.
„ЕУ нема никакви дополнителни услови, ниту дополнителни гаранции. Има само еден услов – уставни измени и внесување на малцинствата во Уставот“, наведуваат од СДСМ.
Оттаму додаваат дека сите други тврдења биле обид за одвлекување на вниманието од суштината на процесот и побараа Владата да престане со, како што велат, манипулирање на граѓаните.
Во реакцијата, СДСМ повика и на распишување референдум, на кој граѓаните би се изјасниле за иднината на државата.
„Граѓаните сами нека одлучат дали сакаат европска иднина или изолација и криминал“, порачаа од опозициската партија.
СДСМ воедно побара забрзување на реформските процеси и итно усвојување на уставните измени како дел од евроинтегративниот пат на државата.
