СДСМ: Македонија е изоставена од патоказите кон ЕУ, Мицкоски ја носи земјата во изолација

СДСМ обвини дека Македонија е изоставена од акционите планови што Брисел ги подготвува за земјите кои се најблиску до членство во Европската Унија. Од партијата посочуваат дека патокази се подготвуваат за Црна Гора, Украина, Молдавија и Албанија, додека Македонија, заедно со Србија, Косово и Босна и Херцеговина, не е опфатена.

Од СДСМ велат дека Македонија меѓу првите го започнала европскиот пат, но дека сега повторно е оставена да чека поради, како што тврдат, неизвршувањето на реформите.

— реклама —

„Доби рок. Го продолжи за една година. Вети 1 јуни. Оттогаш ни глас“, наведуваат од партијата, обвинувајќи ја Владата за состојбите во судството, обвинителството и полицијата, како и за лошата оценка во извештајот на Европската комисија.

Според СДСМ, отсуството на Македонија од новите европски патокази е последица на политиките на Владата, предводена од Христијан Мицкоски.

— реклама —

Од партијата тврдат и дека ваквата состојба им одговара на Србија и на Русија, оценувајќи дека Македонија надвор од Европската Унија би претставувала простор за влијание и „тампон-зона“ кон ЕУ.

— реклама —

СДСМ упатува критики и кон Левица, која ја обвинува дека со своите ставови против НАТО и ЕУ придонесува за, како што велат, задржување на земјата во место.

Од партијата ја критикуваат и политиката на Владата кон САД, Кина и Унгарија, наведувајќи дека стратешкото партнерство со САД, кинеските средства и унгарските кредити не се доволни без напредок во европските интеграции.

„СДСМ го кажува просто. Изолацијата не падна од небо. Ја работи кабинетот“, велат од партијата.

Од СДСМ додаваат дека, според нив, реформите се клучни за напредокот кон ЕУ и дека „кој ги запира реформите, ја запира Европа“. Партијата порачува дека Македонија не треба да биде изолирана од европските процеси и дека патоказот кон ЕУ ќе биде возможен по промена на актуелната власт.