СДСМ обвини дека ВМРО-ДПМНЕ манипулира со информациите поврзани со европските средства за Македонија, оценувајќи дека доделените 65,7 милиони евра од Европската Унија не се доказ за успешно спроведени реформи, туку показател за неисполнети обврски.
Од партијата реагираат на тврдењата на ВМРО-ДПМНЕ дека Европската комисија ги демантирала критиките на претседателот на СДСМ, Венко Филипче, со тоа што на Македонија ѝ доделила најголем износ средства во регионот.
„ЕУ ослободи само 65,7 милиони евра за спроведените реформи во Македонија. Вкупната сума која требаше да се повлече само за периодот јуни 2025 – декември 2025 изнесува 134,87 милиони евра, плус уште 65 милиони евра неповлечени средства за претходниот период. Тоа се над 200 милиони евра изгубени поради реформите на Мицкоски“, велат од СДСМ.
Според опозициската партија, средствата што се доделени не се резултат на целосно исполнување на Реформската агенда, туку се наменети за конкретни области во рамките на Планот за раст на Европската Унија.
„Северна Македонија доби 65,7 милиони евра за образование и дигитализација, Албанија 49 милиони евра за бизнис-околина и иновации, а Црна Гора 44,2 милиони евра за истите цели. Тоа не може да се претставува како исполнување на целата Реформска агенда“, наведуваат од СДСМ.
Од партијата оценуваат дека Македонија стагнира во евроинтегративниот процес, додека другите земји од регионот напредуваат.
„Црна Гора е на чекор до потпишување на пристапниот договор, Албанија е многу блиску до целосно исполнување на обврските, а Македонија стои во место“, стои во реакцијата.
СДСМ повторно го отвори прашањето за уставните измени и внесувањето на малцинствата во Уставот, оценувајќи дека тоа е клучниот услов за продолжување на преговорите со Европската Унија.
„Рокот што Мицкоски го постави – 1 јуни – истече. Реформската агенда не е исполнета. Уште една лага и уште едно неисполнето ветување“, наведуваат од СДСМ.
Партијата побара распишување референдум на кој граѓаните би се изјасниле за европската иднина на државата.
„Граѓаните сами нека одлучат дали сакаат европска иднина или изолација и криминал. Реформи сега. Европа сега“, порачуваат од СДСМ.
