Социјалдемократски сојуз на Македонија со ново соопштение ја критикува Владата, обвинувајќи дека наместо конкретни мерки за заштита на животниот стандард, премиерот Христијан Мицкоски се фокусира на соопштување на цени на горивата.
Од СДСМ тврдат дека цените на основните производи растат повеќе од 45 дена, посочувајќи дека јагнешкото месо надминало 700 денари за килограм, додека јајцата, млечните производи, маслото и зеленчукот бележат континуирани поскапувања.
Според партијата, велигденската трпеза оваа година е „најскапа досега“, при што значителен дел од граѓаните купуваат минимално или воопшто не можат да си дозволат основни производи.
СДСМ обвинува дека Владата нема конкретен план за справување со скапотијата и дека институциите не преземаат сериозни интервенции, оставајќи ги граѓаните сами да се справуваат со растечките трошоци.
Во соопштението се упатуваат и критики за улогата на Регулаторна комисија за енергетика, за која од СДСМ тврдат дека не делува независно.
