Од СДСМ реагираат дека премиерот Христијан Мицкоски денес зборува за унапредување на соработката со НАТО, иако, според нив, тој и ВМРО-ДПМНЕ претходно се спротивставувале на членството на Македонија во Алијансата.
Во партиското соопштение се наведува дека министерот за надворешни работи Тимчо Муцунски, за време на посетата на Брисел, изјавил дека НАТО е „феноменална работа“, бидејќи покрај безбедноста на граѓаните обезбедува и сигурност за странските инвеститори.
Од СДСМ тврдат дека клучните државни одлуки поврзани со членството во НАТО и евроатлантската ориентација биле донесени од нивната партија и оценуваат дека тие биле неопходни за иднината на државата.
Во реакцијата, СДСМ ја обвинува Владата предводена од ВМРО-ДПМНЕ дека ја оддалечува државата од европските интеграции, како и дека нејзините политики придонеле за намалување на странските инвестиции, раст на корупцијата и заштита на криминалот.
„Мицкоски денес го фали НАТО, но неговата политика ја држи Македонија далеку од европските и евроатлантските структури. Тоа не е државотворност, туку лицемерие и свесно уништување на перспективата на Македонија“, наведуваат од СДСМ.
