Генералниот секретар на Социјалдемократски сојуз на Македонија, Александар Саша Димитријевиќ, обвини дека премиерот Христијан Мицкоски врши притисок врз Обвинителството и му дава насоки на јавниот обвинител Ненад Савески како да постапува.
Според Димитријевиќ, Мицкоски јавно признал дека разговарал со Савески и оценил дека доколку не се постапи на одреден начин, Обвинителството ќе го изгуби кредибилитетот.
„Ова е чиста наредба. Мицкоски повторно му диктира задачи на јавниот обвинител“, рече Димитријевиќ.
Од СДСМ тврдат дека судството и обвинителството се под целосна контрола на власта и дека затоа нема вистински реформи и независно правосудство.
Димитријевиќ побара Савески да поднесе оставка доколку, како што рече, сака да сочува личен интегритет и достоинство.
