СДСМ го обвини премиерот Христијан Мицкоски за лицемерие и за користење, како што велат од партијата, опасна реторика по неговото обраќање на прославата по повод 35 години независност на Македонија.
Од СДСМ посочуваат дека Мицкоски најпрво повикал на единство, а потоа зборувал за потребата да се „расчистува со талогот“. Според опозициската партија, тоа претставува отворена закана и порака дека власта одлучува „кој е талог“.
„Исто како менторот Вучиќ. Повторно копи-пејст. Прво навредување, а потоа повик на единство. Хипокризија во најчиста форма“, велат од СДСМ.
Од партијата особено го критикуваат фактот што Мицкоски на прославата седел до државниот обвинител Ненад Савески, оценувајќи дека со тоа се испраќа порака за поврзаноста меѓу власта и институциите.
„Ова не е државнички говор. Ова е отворена закана“, велат од СДСМ, додавајќи дека граѓаните, опозицијата и критичарите не смеат да бидат нарекувани „талог“.
Од СДСМ во соопштението ја обвинуваат Владата и за, како што тврдат, „криминални тендери“, задолжувања од четири милијарди евра за две години, мито во институциите, поделби и заплашување на критичарите и медиумите.
„СДСМ ќе продолжи да ја брани демократијата, слободата на говор и правото на секој граѓанин да не биде обележан како ‘талог’ само затоа што мисли поинаку“, порачаа од партијата.
Од СДСМ додаваат дека „народот ќе победи, криминалците ќе одговараат, а власта ќе биде вратена на граѓаните“.
