СДСМ обвини дека премиерот Христијан Мицкоски врши политички притисок врз институциите и ја злоупотребува правдата за пресметка со политичките противници.
Од партијата велат дека Мицкоски, преку јавни настапи и изјави, најавува апсења на поранешни функционери и на тој начин, според нив, директно влијае врз работата на правосудните органи.
„Ова не е владеење на правото, туку политички прогон. Мицкоски јавно му дели наредби на Обвинителството и одлучува кој е виновен, а кој не“, соопштија од СДСМ.
Од опозициската партија оценуваат дека Владата нема резултати по две години на власт и дека, наместо да се фокусира на економските и реформските процеси, создава политички конфликти.
„Кога нема резултати, тогаш се бркаат поранешни функционери. Кога нема реформи, тогаш се најавуваат апсења“, наведуваат од СДСМ.
Партијата обвинува дека институциите се користат како политичко оружје против опозицијата и дека земјата има потреба од независно и непристрасно правосудство.
Според СДСМ, вистинската причина за, како што велат, „хајката“ е недостатокот на резултати од работата на Владата, поради што се создава наратив за пресметка со минатото.
