СДСМ обвини дека економската состојба на граѓаните се влошува, оценувајќи дека изјавите на премиерот Христијан Мицкоски оти државата финансиски стои добро не соодветствуваат со реалната состојба.
Од партијата наведуваат дека граѓаните се соочуваат со високи животни трошоци и ниски примања, при што, според нив, минималната плата не е доволна за покривање на основните потреби на едно четиричлено семејство.
Во соопштението СДСМ тврди дека потрошувачката кошничка поскапела за околу 10.000 денари во последните две години, додека платите остануваат меѓу најниските во Европа.
Партијата ја критикува Владата и за јавните финансии, посочувајќи дека годинава бил потрошен планираниот буџетски дефицит, а државата продолжува со нови задолжувања. Според СДСМ, јавниот долг за две години е зголемен за околу 2,5 милијарди евра и достигнал речиси 11 милијарди евра.
Од СДСМ наведуваат и дека предложениот ребаланс на буџетот, според нив, претставува признание дека економските проекции не се остваруваат. Посочуваат дека со ребалансот е намалена проекцијата за економски раст, а зголемени се буџетскиот дефицит, расходите и задолжувањата.
Во соопштението се наведува и дека странските директни инвестиции во 2025 година се намалени за 61 процент, индустриското производство бележи пад, а бројот на вработени во индустријата е намален за 2,6 проценти во мај во споредба со истиот период минатата година.
СДСМ оценува дека овие показатели, според партијата, ја демантираат тезата дека државата финансиски стои добро.
