СДСМ преку соопштение ја оцени најавената реконструкција на Владата како политичка претстава зад која, според партијата, не стојат суштински реформи ниту промени во политиките.
Од опозициската партија велат дека додека граѓаните се соочуваат со економски предизвици, поскапувања и намален животен стандард, владејачкото мнозинство се занимава со кадровски промени наместо со решавање на реалните проблеми.
Во соопштението се посочува дека најавените разговори меѓу ВМРО-ДПМНЕ и ЗНАМ не носат суштински промени, туку претставуваат обид за, како што наведуваат, „мачкање очи на јавноста“.
СДСМ обвинува дека Владата не успеала да одговори на економските предизвици, наведувајќи пад на инвестициите, висок буџетски дефицит и иселување на младите како клучни проблеми со кои, според нив, државата се соочува.
Од партијата оценуваат дека реконструкција без вистински реформи, одговорност и промена на политичкиот курс не може да донесе подобрување на состојбите.
„Граѓаните не сакаат нови министри кои ќе продолжат со истите политики, туку конкретни резултати и одговорност“, велат од СДСМ.
Според опозициската партија, проблемот не е само во поединечните функционери, туку и во политиките што ги спроведува актуелната власт.
