СДСМ: Нова козметичка операција на тендер коалицијата наречена „реконструкција на Владата“

СДСМ преку соопштение остро реагираа на најавите за средба меѓу коалициските партнери во Владата поврзана со можна реконструкција на владиниот состав, оценувајќи дека станува збор за „козметичка операција“ која нема да донесе суштински промени.

— реклама —

Според опозициската партија, Владата предводена од ВМРО-ДПМНЕ и ЗНАМ веќе две години не успева да испорача резултати во клучните области, поради што реконструкцијата ја сметаат за обид за прикривање на неуспесите.

„Наместо вистински реформи и одговорност, добиваме само шминка на Владата и мачкање очи на јавноста“, наведуваат од СДСМ.

— реклама —

Од партијата упатија критики и кон ЗНАМ, тврдејќи дека партијата се соочува со внатрешни проблеми и губење на политичка поддршка, додека истовремено изразува задоволство од работата на своите функционери во извршната власт.

— реклама —

СДСМ обвинува дека во изминатиот период владејачката коалиција била фокусирана на тендери и распределба на јавни ресурси, наместо на решавање на економските предизвици, подобрување на животниот стандард и напредок на евроинтегративниот процес.

„Наместо реконструкција која ќе значи промена, добиваме театарска претстава во која се обидуваат да ја продолжат истата политика“, велат од партијата.

— реклама —

Од СДСМ порачуваат дека на граѓаните им се потребни конкретни резултати, подобар животен стандард и отчетност, а не кадровски промени кои, според нив, нема да донесат суштински промени во функционирањето на Владата.