СДСМ го повика градоначалникот на Скопје, Орце Ѓорѓиевски, да одговори за состојбата со епидемијата во главниот град, откако, според партијата, до 18 август биле регистрирани 38 заболени и четири смртни случаи.
Од партијата наведуваат дека 37 од регистрираните случаи се од Скопскиот регион, додека починатите биле мажи на возраст од 62 до 83 години од Скопје.
„Ако прскањето од 7 мај било толку успешно, зошто токму Скопје е епицентар?“, прашуваат од СДСМ, оценувајќи дека самото наведување на датумите на третманите против комарци не е доволен доказ за нивната ефикасност.
СДСМ тврди дека доколку биле спроведени повеќе третмани против ларви, како и авионско и теренско прскање, а епидемијата сепак се шири во Скопје, потребно е да се утврди дали мерките биле навремени и доволно ефикасни и дали сите жаришта биле соодветно третирани.
Од партијата посочуваат дека особено ранливи се постарите лица и хронично болните, а бараат одговори за ефикасноста на спроведеното прскање, локациите на потенцијалните жаришта и навременоста на упатствата до граѓаните.
„СДСМ нема да молчи за јавното здравје. Бараме одговор, не сензација“, наведуваат од партијата.
Од СДСМ дополнително го повикуваат Ѓорѓиевски да објасни како дошло до ширење на вирусот во Скопје, доколку, како што тврдат, мерките против комарците биле навремено и соодветно спроведени.
