СДСМ: Останаа уште 6 дена до уште едно неисполнето ветување на Мицкоски

СДСМ соопшти дека остануваат уште шест дена до 1 јуни – рокот што, според партијата, самиот премиер Христијан Мицкоски си го поставил за целосно исполнување на Реформската агенда и обврските за продолжување на европскиот пат на државата.

Од партијата велат дека станува збор за „уште една голема лага и неисполнето ветување“ на Мицкоски.

— реклама —

„6 дена до уште една потврда дека ВМРО-ОКГ намерно ја држи државата заглавена, изолирана и далеку од Европа заради сопствени бизниси и криминални тендери“, велат од СДСМ.

Според нив, од 10-те клучни точки од Реформската агенда, реализиран е само мал дел и тоа делумно.

— реклама —

СДСМ оценува дека клучно за продолжување на европскиот пат се уставните измени и внесувањето на малцинствата во Уставот.

„Без тоа, нема отворање на следната фаза од преговорите, нема членство во ЕУ, нема ништо. Нема нови европски фондови. Нема повеќе инвестиции. Нема подобар животен стандард за граѓаните“, наведуваат од партијата.

— реклама —

Од СДСМ потсетуваат дека Мицкоски тврдеше дека има апсолутно мнозинство и дека ја укинал техничката влада без консензус со опозицијата.

„Сега нека ги заврши реформите, нека ги исполни обврските до 1 јуни, како што ветуваше. Да не ја обвинува ЕУ дека сака да ни го загрози идентитетот туку нека ги внесе малцинствата во Уставот“, порачуваат од СДСМ.

— реклама —

Партијата додава дека доколку тоа не се случи, Мицкоски треба јавно да признае дека не сака членство во Европската унија.

„Или јавно нека признае дека не сака членство во ЕУ затоа што се плаши од европско обвинителство, независно правосудство и од одговорност“, стои во реакцијата на СДСМ.