Според СДСМ германските медиуми со своите анализи за поразот на Виктор Орбан ја потврдуваат тезата на партијата изнесувана изминатите месеци.
Од СДСМ оценуваат дека падот на Орбан не е само внатрешнополитичко прашање во Унгарија, туку настан со директни последици за целиот регион, особено за политичари кои, како што наведуваат, биле под негова заштита – меѓу нив и Христијан Мицкоски, како и Александар Вучиќ и Милорад Додик, кои ги опишуваат како дел од „авторитарното братство“.
СДСМ наведува и став од германскиот „Франкфуртер алгемајне цајтунг“, според кој Орбан изградил мрежа од нелиберални аналитички центри, медиуми и партии, со финансиска и политичка поддршка, чија иднина сега е неизвесна.
СДСМ тврди дека со падот на Орбан се потврдува постоење на мрежа на влијание, финансирање и злоупотреба на медиуми надвор од европските демократски стандарди, како и дека се затвора „чадорот“ над Балканот што го штител ваквиот политички модел.
Од таму додаваат дека ова значи слабеење на, како што велат, антиевропските и автократски влијанија во регионот, што е лоша вест за Мицкоски, а добра за граѓаните и демократијата.
СДСМ заклучува дека со овие процеси доаѓа време за одговорност и правда.
