СДСМ пак го повикува нивниот градоначалник преку соопштенија: Граѓаните да одлучат за рудникот, не власта

Опозициската СДСМ побара од градоначалникот на Крива Паланка, Сашко Митовски, да распише референдум за проектот за рудник за антимон, оценувајќи дека одлуката мора да ја донесат граѓаните.

Од партијата тврдат дека зад проектот стојат лица блиски до власта и дека институциите не нудат доволни гаранции за заштита на животната средина.

— реклама —

„Градоначалниче, референдум! Нека граѓаните на Крива Паланка сами одлучат дали сакаат рудник за антимон во својот крај“, соопштија од СДСМ.

Во реакцијата се наведува дека економските интереси не смеат да бидат приоритет пред здравјето на населението, при што се повикуваат на, како што велат, претходни негативни искуства со рударски активности.

— реклама —

„Имаме страшни искуства од минатото со рудниците во Македонија, Крива Паланка има свој пример со загадувањето на реката“, наведуваат од партијата.

СДСМ посочува дека според анализи од претходниот период, во Крива Река биле регистрирани високи концентрации на тешки метали и други штетни материи.

— реклама —

„Пред една година анализи покажаа дека концентрацијата на тешки метали, цијанид и други токсични материи во Крива Река беше десетици пати над дозволеното“, соопштија од СДСМ.

Партијата го повикува локалното раководство да овозможи директно изјаснување на граѓаните за проектот, оценувајќи дека станува збор за прашање со сериозни последици по животната средина.

„СДСМ јасно стои на страната на граѓаните: референдум за рудникот“, порачаа од партијата.

Засега нема реакција од градоначалникот, ниту од надлежните институции за барањето, додека темата за отворање на рудникот продолжува да предизвикува политички и јавни реакции.