Од СДСМ наведуваат дека граѓаните на Унгарија „јасно и гласно рекле ‘доста е автократија’“ и дека во земјата дошло до политичка промена по парламентарните избори.
СДСМ посочуваат дека по 16 години владеење на унгарскиот премиер Виктор Орбан, „неговиот недемократски режим паднал“.
Се додава дека на изборите победила партијата Тиса, предводена од Петер Маѓар, при што се оценува дека тоа претставува „победа на демократијата над автократијата, на Европа над руското и кинеското влијание и на владеењето на правото над корупцијата“.
Во реакцијата се наведува и дека „криминалната организација ВМРО останува без својот единствен сојузник во Европската Унија“, како и дека „нема повеќе криење на Никола Груевски во Будимпешта, тајни бизнис-комбинации, ниту кинески пари кои доаѓаа преку тој режим“.
Понатаму додаваат дека „паѓаат автократските режими“, при што се оценува дека „следен е Александар Вучиќ, а со него и Христијан Мицкоски“, како и дека „регионот припаѓа на Европа, а не на Русија“.
СДСМ оценува дека историската победа во Унгарија испраќа порака дека „времето на автократите завршува“.
