СДСМ соопшти дека поднеле кривична пријава до Јавното обвинителство против повеќе физички и правни лица, меѓу кои и сопствениците на Алфа ТВ од Унгарија, поради сомнежи за перење пари, даночно затајување и фалсификување деловни книги.
Според партијата, пријавата се однесува и на унгарскиот бизнисмен Питер Шац, како и управителите на компаниите „Таргет Медиа“ и „Алфа Скоп“, при што се тврди дека постои организирана шема на финансиски трансакции преку кои, од 2017 година наваму, во земјава биле префрлени околу 2,85 милиони евра.
Од СДСМ наведуваат дека средствата биле прикривани преку фиктивни договори за маркетинг и рекламирање со компании без реална економска активност, како и преку таканаречени „школка-компании“, со цел заобиколување на законите за транспарентност.
Партијата тврди дека постојат сомнежи за внесување невистинити податоци во деловните книги и легализација на сомнителен капитал, додавајќи дека за случајот веќе имало постапка која, според нив, не е доведена до крај.
Од СДСМ побараа институциите итно да постапат, да ги обезбедат доказите и да утврдат одговорност.
