СДСМ предлага воведување на државните награди „Блаже Конески“ и „Ремзи Несими“

Пратеничката група на СДСМ и коалицијата до Собранието поднесе предлог-закон за изменување и дополнување на Законот за државни награди, со кој се предвидува воведување на две нови државни признанија – „Блаже Конески“ и „Ремзи Несими“.

— реклама —

На денешната прес-конференција, пратеничката Бисера Костадиновска-Стојчевска истакна дека целта е да се оддаде признание за врвни научни и стручни достигнувања во областа на македонскиот и албанскиот јазик.

— реклама —

Државната награда „Блаже Конески“ се предлага по иницијатива на Советот за македонски јазик, доставена до Владата уште во 2019 година. Таа би се доделувала за високи стручни и научни достигнувања во областа на македонскиот јазик во земјата и странство. Конески се смета за основоположник на современата македонска наука за јазикот, а зад себе остави значајно творештво како лингвист, поет, прозаист, преведувач и културен деец.

— реклама —

Истовремено, по иницијатива на Институтот за духовно и културно наследство на Албанците, се предлага воведување на државната награда „Ремзи Несими“, која би се доделувала за достигнувања во областа на албанскиот јазик и албанологијата. Несими беше истакнат лингвист, универзитетски професор и единствен делегат од Македонија кој учествувал на Конгресот за правопис на албанскиот јазик во 1972 година, каде што бил и потписник на Резолуцијата за албанскиот правопис.

— реклама —

Од СДСМ велат дека со овие измени ќе се оддаде институционално признание на личности чие дело оставило траен белег во развојот и афирмацијата на македонскиот и албанскиот јазик и култура.