Владејачката коалиција е зафатена од внатрешни судири и борба за позиции, оценуваат од СДСМ во нивното соопштение, коментирајќи ги најавите за можна реконструкција на Владата.
Од опозициската партија тврдат дека во коалициските редови владее хаос и дека наместо решавање на проблемите на граѓаните, фокусот е ставен на распределба на функции и тендери.
Според СДСМ, партијата ЗНАМ се соочува со сериозни внатрешни поделби, при што, како што наведуваат, постојат несогласувања околу идните позиции во власта.
„Додека пред јавноста се претставуваат успеси и позитивни резултати, зад затворени врати се води жестока борба за фотелји и лични интереси“, велат од СДСМ.
Оттаму прашуваат зошто е потребна реконструкција доколку, како што велат од власта, резултатите се добри.
„Граѓаните се соочуваат со секојдневни економски предизвици, а власта е преокупирана со внатрешни пресметки и нови задолжувања“, посочуваат од СДСМ.
Од партијата додаваат дека Владата за две години значително го зголемила јавниот долг и обвинуваат дека државата се движи во погрешна насока, порачувајќи дека е потребно враќање на европскиот пат и воспоставување одговорност за сите носители на јавни функции.
