По деновите исполнети со јавни критики и внатрепартиски несогласувања, Извршниот одбор на СДСМ упати повик до сите поединци и групи што имаат забелешки за работата на партијата, дебатата да ја водат во рамките на партиските органи, а не преку медиумите и вонпартиски иницијативи.
Заклучоците од денешната седница ги соопшти членот на Извршниот одбор, Герасим Лазов, кој истакна дека партијата останува фокусирана на економските состојби во државата, но и на зачувување на внатрешното единство.
Од Извршниот одбор оцениле дека економската состојба во државата се влошува, животниот стандард на граѓаните опаѓа, а со ребалансот на Буџетот, според нив, дополнително се зголемува задолжувањето.
„ИО изрази сериозна загриженост за лошата економска состојба во земјата и влошениот животен стандард на граѓаните, во Буџетот нема пари, власта трупа нови долгови и со ребалансот состојбата со долговите се влошува. СДСМ ќе продолжи да се бори против погрешните економски и криминални политики на Владата на Мицкоски, во интерес на граѓаните и на државата“, соопшти Лазов.
Посебен акцент на седницата бил ставен на внатрепартиските односи. Извршниот одбор донел заклучок сите несогласувања и критики да се отвораат во партијата.
„Извршниот одбор оцени дека секоја дебата којашто се однесува на СДСМ треба да се води во партијата, пред органите и телата, а не надвор од неа. Во оваа насока Извршниот одбор на СДСМ донесе заклучок јавно да ги повика на дебата во партијата сите поединци или групи, да дебатираме тука за борбата против криминалната власт на Мицкоски“, наведува Лазов.
Тој додава дека вратите на СДСМ се отворени за секој што, како што вели, ѝ мисли добро на партијата и ги споделува нејзините вредности.
„Само низ дијалог и соочување на аргументите внатре во партијата може да се разговара, не преку медиуми, не преку вонпартиски иницијативи и платформи кои ѝ прават штета и ја рушат партијата одвнатре“, наведува Лазов.
Од СДСМ порачуваат дека партијата се подготвува за, како што велат, силна политичка офанзива против Владата, а истовремено упатуваат повик до членството да не дозволи поделби.
„Упатуваме порака до целокупното членство, симпатизерите и активистите – партијата е силна, стабилна и има длабок корен. Во овој клучен момент, нема простор за вештачки создадени поделби, дефокусирање или внатрешни сопнувања. Единството е нашето најсилно оружје. Разликите во размислувањата се наша предност, но целта ни е и треба да ни остане заедничка – фронтот за вистина и правда“, стои во заклучоците од Извршниот одбор.
