Опозициската СДСМ оценува дека техничката влада мора да остане како единствен механизам за обезбедување, како што велат, барем минимално фер и демократски изборни услови, обвинувајќи ја власта за целосна партизација на институциите.
Од партијата упатија остри критики кон премиерот Христијан Мицкоски и ВМРО-ДПМНЕ, тврдејќи дека власта има воспоставено контрола врз судството, обвинителството, полицијата и медиумите.
„Оваа ненародна власт предводена од шефот на криминалната организација ВМРО – Христијан Мицкоски, целосно ја узурпира државата. Судството, Обвинителството, полицијата, медиумите… сѐ е партизирано“, соопштија од СДСМ.
Во реакцијата се наведува дека владата настојува да ја укине техничката влада, која, според СДСМ, претставува последен механизам за контрола на изборниот процес.
„Сега Мицкоски сака да ја укине техничката влада, единствениот преостанат механизам кој може да обезбеди барем минимални фер и демократски услови за избори“, наведуваат од партијата.
СДСМ дополнително тврди дека владата ја менува законската рамка поврзана со странците и дека со измените се зголемува квотата за, како што велат, „економски работници“.
„Тој тивко го смени Законот за странци, ја смени терминологијата и мигрантите ги нарече „економски работници“. Квотата ја зголемија на 10.000 економски работници за 2026 година“, соопштија од СДСМ.
Партијата истакнува дека техничката влада била воспоставена со политички консензус и поддршка од меѓународната заедница и дека нејзиното укинување треба да се случи под исти услови.
„Техничката влада е воведена со консензус и со поддршка на меѓународната заедница и само така може да се укине“, наведуваат од СДСМ.
Од таму порачуваат дека актуелните политички состојби не се соодветни за укинување на овој механизам и најавуваат дека ќе продолжат со, како што велат, борбата за фер изборни услови.
