Со остри критики и тешки обвинувања, СДСМ го нападна премиерот Христијан Мицкоски, обвинувајќи го за навредување на граѓаните и за, како што велат од партијата, копирање на политичкиот речник на српскиот претседател Александар Вучиќ.
Во партиското соопштение насловено „Мицкоски – баш арамија!“, од СДСМ велат дека премиерот ги навредува граѓаните што не ја поддржуваат ВМРО-ДПМНЕ.
„Секој што не е за неговата криминална организација – веднаш, по моделот на Ванчо Михајлов, станува ‘талог’“, наведуваат од СДСМ.
Од опозициската партија го критикуваат Мицкоски и поради неговата политичка реторика, оценувајќи дека тој, како што тврдат, го имитира Вучиќ и ги повторува неговите пораки.
СДСМ го обвинува премиерот и за лажење, корупција и криминал, без притоа во соопштението да наведува конкретни нови докази за изнесените тврдења.
„Ваков арамија народот не памти“, стои во соопштението.
Од СДСМ додаваат дека граѓаните, според нив, се засрамени од начинот на кој Мицкоски ја извршува функцијата премиер и од неговото однесување кон сопствениот народ.
Во соопштението партијата го критикува и односот на Мицкоски кон неговите политички противници, посочувајќи дека тој себеси и своите соработници ги нарекува „елита“.
„На таква елита местото ѝ е во Шутка и Идризово“, наведуваат од СДСМ.
Од партијата на крајот повторно го обвинуваат премиерот, користејќи го изразот „арамија“, и велат дека тој претставува „срам за нашата земја“.
