СДСМ обвини дека премиерот Христијан Мицкоски и ВМРО-ДПМНЕ се обидуваат да се поврзат со историското наследство на АСНОМ, иако, според партијата, немаат организациска, идејна ниту кадровска поврзаност со антифашистичкото движење.
Во партиското соопштение се наведува дека СДСМ е политички наследник на АСНОМ и на Народноослободителната борба и оценува дека тоа не може да се промени.
Од СДСМ тврдат дека Мицкоски го искористил одбележувањето на Илинден за политички напади врз своите неистомисленици, наместо, како што наведуваат, да биде премиер на сите граѓани.
Во реакцијата партијата упатува критики и за, како што велат, политиките на актуелната власт, обвинувајќи ја дека ја блокира европската интеграција, ја изолира државата и работи спротивно на интересите на Македонија.
Од СДСМ, исто така, ги отфрлаат пораките на Мицкоски за борба против омразата и поделбите, тврдејќи дека токму тој, според нив, придонел за политичката поларизација во земјата.
Во соопштението партијата наведува дека, како што велат, „доаѓа времето на вистината и правдата“, оценувајќи дека актуелната власт ќе одговара за своето работење пред независни институции.
