СДСМ обвини дека министерот за внатрешни работи Панче Тошковски нема кредибилитет да зборува за борбата против криминалот, оценувајќи дека, наместо да се справува со криминалот, ја штити, како што наведуваат, „криминалната организација на власт“.
Од партијата тврдат дека во изминатите две години, со ВМРО-ДПМНЕ на власт, во државата владеат селективна правда, криминал, неказнивост и партизирани институции.
СДСМ посочува дека сè уште нема одговорност за случајот со петте тони дрога што, според нив, поминале преку македонската граница, ниту, пак, за други случаи во кои, како што велат, функционери и лица блиски до власта останале недопирливи за законот.
Во реакцијата се наведува и дека граѓаните биле сведоци на убиства, вооружени пресметки, експлозии, запалени автомобили, како и пораст на семејното и врсничкото насилство, при што, според СДСМ, институциите не обезбедиле соодветна заштита.
Партијата упати обвинувања и за, како што наведува, милионски тендери поврзани со фирми блиски до власта, како и за наводна злоупотреба на институциите.
„Тошковски може да презентира какви сака статистики. Реалноста е дека државата е затруена од криминал и корупција, а граѓаните не се чувствуваат безбедно ниту дома, ниту на улица“, порачаа од СДСМ.
