СДСМ: Уште 1 ден до враќањето на Мицкоски од екскурзија

СДСМ преку соопштение упати остри критики до премиерот Христијан Мицкоски поради неговиот престој во Брисел, оценувајќи дека додека тој е на, како што велат од партијата, „стручна екскурзија“, проблемите во земјава остануваат нерешени.

Од опозициската партија велат дека останува уште еден ден до неговото враќање, потсетувајќи дека по неколкудневниот престој во Бриж следувале активности во Брисел, кои официјално биле поврзани со изучување на Францускиот предлог.

— реклама —

СДСМ го обвинува Мицкоски дека во периодот додека е отсутен не се занимава со, како што наведуваат, проблемите со водоснабдувањето, епидемиолошката состојба и ширењето на западнонилската треска.

Од партијата особено го посочуваат Гостивар, каде, според нивните тврдења, веќе со недели постои проблем со водата за пиење, а граѓаните сè уште немаат јасен одговор кога таа ќе биде безбедна за употреба.

— реклама —

„Уште еден ден до крајот на екскурзијата“, порача СДСМ, додавајќи дека граѓаните останале со проблемите, додека дел од владејачките функционери заминале на одмори.

Опозициската партија ја критикува и владината политика кон Европската Унија, прашувајќи што конкретно научил премиерот за Францускиот предлог за време на престојот во Брисел.

— реклама —

Од СДСМ велат дека со нетрпение го очекуваат неговото враќање и извештајот за посетата, при што иронично прашуваат дали премиерот конечно ќе признае дека Францускиот предлог е дел од преговарачката рамка.

„Само да не се повтори старото сценарио: едно да научи во Брисел, а сосема друго да им продава на граѓаните дома“, велат од СДСМ.

Од партијата додаваат дека по враќањето на Мицкоски го очекуваат и неговото соочување со домашните проблеми, кои, како што велат, „не заминаа на екскурзија“.

„Уште еден ден. Потоа извештај. Ние чекаме“, порачуваат од СДСМ.