Христијан Мицкоски повторно ја активираше добро познатата стратегија за мачкање очи на граѓаните за сопствениот неуспех. Роковите истекуваат, а реформи нема па Мицкоски почна со нова кампања, велат од опозициската СДСМ.
„Првиот дел од таа кампања е намерно заострување на односите со Бугарија и најавува дека не очекува подобрување, туку нови тензии и конфликти.
Вториот дел од кампањата беше нападот кон СДСМ и лажното обвинување дека за тоа што владата не спроведува реформи виновен е некој друг. Мицкоски почна со напади дека опозицијата ја кочи реформската агенда за само по неколку дена да признае дека не му е потребна опозицијата.
Работите се многу јасни.
Мицкоски има апсолутно мнозинство во Собранието, нешто што самиот постојано го повторува. Како што без консензус ја укина техничката влада, може сам да ги донесе и сите останати закони и реформи.
За тоа СДСМ не му е потребен, што и самиот призна.
СДСМ му треба само како алиби за сопствениот неуспех и за фактот дека не ги исполнува условите за продолжување на преговорите и отворање на европските поглавја.
Тоа е целата вистина. Иста матрица, исти лаги, само друга тема.
Како што ветуваше дека ќе го укине Преспанскиот договор, без да каже дека тоа значи излегување од НАТО, како што ги лажеше граѓаните дека ќе го врати името во БЈРМ или ФИРОМ, како што лажеше дека е загрозен македонскиот идентитет така и денес лаже.
Тогаш Мицкоски клечеше и молеше за власт а денеска Македонија е на колена. Мицкоски не сака Европска Унија.
Не сака европски правила, се плаши од европско обвинителство и европска контрола, затоа што тогаш нема да може да функционира системот на криминал, тендери и злоупотреби туку ќе треба да одговара.
Затоа ги држи сите граѓани како заложници на сопствените стравови и интереси на криминалната група околу него.
Но времето на лагите изминува.
Доаѓа времето на вистината, правдата и одговорноста“, се вели во соопштението.
